「有咩好得過做女嗰陣﹖」呢句說話真係金石良言。即使屋企未必係大富大貴，但都有父母愛護，的確係無得比。尤其係前排同老公終於成功上樓，裝修期間返娘家住，完全唔洗做家務，飯來張口，衣來伸手，仲未出嫁嘅女仔係唔會明。
結婚之後同老公二人世界，每個週末都會上奶奶度食飯。稍有距離感嘅相處令我同奶奶關係一路都唔錯，直至最近一次家庭旅行先出現問題。
我哋三個加上姑仔一行四人去沖繩自駕遊，諗住自駕遊可以解決交通上嘅問題，點知原來飲食先係最大問題﹗奶奶嫌燒肉熱氣、又覺得魚生生冷，只係獨孤一味食拉麵。為咗遷就奶奶，基本上我哋餐餐都拉麵炒飯。
由我辛苦計劃嘅行程，奶奶都有唔少怨言，姑仔都知我唔開心，一路上不斷開解我，建議下次可以試吓去泰國，可能食物會啱口味啲。聽到下次兩個字都有啲怯……
交通方面，我一開始淨係用google map搵路，原來用中文搵日本餐廳或者景點有時都會搵唔到，搞到奶奶要等，就開始有啲怨言。之後我上網搵，原來有個日本網頁 Mapcode，係日本獨有嘅地圖資料系統，可以搵到目的地嘅mapcode，再將mapcode打落去汽車內置導航系統，再搜尋路線就會準好多，就算地方幾「山旮旯」都冇有怕啦！
日本自駕遊最怕就係語言不通，唔識係當地租車，今次我出發之前就用Tabiral呢個app做好租車嘅所有手續，個介面非常簡單，你只要打租還日期，地點，車款，佢就會有好多選擇俾你揀，就算唔識日文都睇得明，慳番好多時間！
Tabiral：
仲有一件大頭蝦嘅事，我竟然買錯咗保險！平時去旅行都買開嗰隻，而今次都唔例外，但係出發咗先發覺原來佢唔保自駕遊，好彩今次冇咩意外發生，唔係嘅話真係得不償失！所以出發前記得睇清楚條款，租車記得買汽車保險啦！
返咗香港之後，有晚去奶奶屋企食飯，奶奶特登煲雞腳湯俾我，佢同我講每去到一個景點姑仔就自己走去玩，都知我拖住佢周圍行辛苦。我突然覺得慚愧……唯有下次再計劃得好啲，出發前做足準備，再挑戰帶奶奶去曼谷﹗
