【YAS 旅行解難】唔見嘢點算好﹖YAS 教你點報失

無論準備幾充足都好，旅途上總有機會遇到好多意料之外嘅事，其中最怕就係財物損失。醒目嘅你會話：有旅遊保險冇有怕！你咁諗只係啱咗一半……點解﹖

• 旅保涵蓋嘅範圍 不同旅保並非每樣失物都受保障，例如珠寶手飾、電話、laptop、tablet 未必會包括在內。
• 旅遊保險上限 市面上大部份保險產品都有上限，市面上大部份保險產品都有最高保障金額，選擇旅保嗰陣，記得要睇清楚保障範圍呀！

報失程序：

1. 迅速行事好緊要。一定要喺事發24小時內到當地警局報案。特別建議去較大型嘅地區警局報案，因小型警崗嘅警員大多面對街坊，外語能力未必足以幫你錄口供。
2. 報案後你會得到一張證明，上面會陳述你嘅失物、失物時間及地點、價值，仲有負責警員簽署或蓋印。
3. 回港後將報案證明、失物嘅購買單據以及顯示實際旅行日期嘅登機證等文件一併交去保險公司考量。如果係唔見行李更加要列出行李箱內嘅失物清單，並盡量提供收據。

唔好覺得旅遊保險平平地百幾蚊就唔睇清楚條款呀，一旦遺失財物，claim 唔claim 到之間可以去到幾千蚊嘅分別。精明嘅你，識點做啦！