去旅行，投唔投保？
話說最近朋友A去完旅行約咗班姊妹出嚟食Tea派手信，大家好自然傾起去旅行嘅話題，突然有人爆咗一句次次去旅行都買保險但一次都未Claim過覺得好搵笨，以後如果去短Trip打算唔買保險，成班人即刻呆咗﹗話明保險梗係未雨綢繆，意外就係意料之外吖嘛，我就曾經試過兩次比較特別嘅情況：
Lesson 1：航班延誤
有次我由哥本哈根Copenhagen 飛斯德哥爾摩Stockholm 轉機返香港，但係飛機故障，起飛嗰刻已經知道趕唔切搭返香港班機，滯留Stockholm一晚。最後成功Claim到旅遊保險，不過其他朋友因為買唔同旅保所以賠償金額比我收到嘅少，所以識得揀都好重要。
Lesson 2：航空公司倒閉？
早前某航空公司傳聞將會倒閉，而當時我準備出發去日本，為免到時影響行程，我特登買多一份註明會就航空公司倒閉而有賠償嘅保險，因為當時消息傳得太犀利只有兩間保險公司受保。當然呢次就冇Claim到錢，不過我自己就覺得小心駛得萬年船。
花少少錢買個安心，去旅行都唔會囉囉攣啦﹗
