BB出世後冇耐就要重返職場，好彩有屋企人體諒又有同住嘅奶奶幫手湊B，大大減輕返工嘅顧慮，而且工作地方有空間容許泵奶，啱晒我呢位母乳媽媽。
海外泵奶
前排公司突然調派我去澳洲開會，於是就煩惱緊應該要點處理，始終唔想白白浪費自己嘅母乳，正所謂：食得唔好嘥！
於是我就即刻google下睇有無辦法可以將母乳帶返香港，原來有唔少媽咪都會係外遊時帶母乳返屋企，令我信心大增。
泵奶時要注意
除咗一啲基本泵奶用具外，只係需要另外買冰袋冰磚保鮮。媽咪切記要定時泵奶，唔好打亂既定時間表。
開工時將母乳入袋寫好日期時間，然後放入公司雪櫃，放工就用冰袋帶返酒店。記得要預先同酒店溝通，有啲酒店可以託佢哋冰鮮冷藏。
母乳行李收納
執行李時用毛巾將一舊舊冰同製冷冰磚包好入袋，盡量唔好同衫褲放埋一齊，然後託運返香港。
實測之後，返到屋企打開袋都依然見到係結晒冰，證明個方法真係work！以後各位媽媽要出trip就冇有怕啦！
