【YAS 媽媽】媽咪終極忍口大挑戰！

眼見身邊朋友一個又一個懷孕，同一眾準媽媽一齊行街，發現原來做咗媽咪真係有好多嘢係唔做得，開始唔只係考慮自己，仲要諗埋肚入面個B。

去旅行緊係想咩嘢食都試下，但喺懷孕期間有好多嘢都要暫時戒一戒口，如果返香港人鄉下——日本，咁應該點注意呢？

1. 避免食用未經包裝嘅雪糕
   
   雪糕及雪芭易有李斯特菌，特別係路邊嘅軟雪糕，孕婦在懷孕頭三個月患上此病可導致流產，到妊娠第三期、即廿九至四十周患上就可導致早產、嬰兒出生時體重過輕甚至死亡。
2. 避免飲用農場鮮奶
   牛奶係日本名物之一，唔少孕婦都會飲奶補充所需營養。一般嚟講，經正規嘅消毒程序的奶類製成品都可以安心享用。但係一啲小眾農場所生產嘅牛奶（通常以玻璃樽為主）消毒方法會同一般超市賣嘅牛奶有所不同，牛奶有機會只係以低溫65度消毒，李斯特菌有機會係奶製品裡面繁殖，所以可免則免！
3. 避免食用魚生等未經煮熟嘅海鮮
   
   魚生雖然真係好吸引去到日本點可以唔食呢！但係為咗肚入面個B，都真係要忍忍口，因為李斯特菌都容易係魚生繁殖，萬一食咗落肚就大鑊啦！而且生冷食物會令本身腸胃相對較弱嘅孕婦胃黏膜血管收縮，胃液分泌會因而降低，導致胃痛消化不良嘅症狀，可免則免。除咗魚生之外，仲有好多嘢食架嘛，拉麵呀，炒飯呀，天婦羅呀，所以為咗個B就真係要忍下口啦！
4. 避免進食糖份高食物
   進食糖份高嘅食物容易引發妊娠糖尿，妊娠糖尿會對小朋友帶嚟長遠影響，經研究指出，患有妊娠糖尿孕婦會增加下一代患上糖尿病，高血壓或癡肥等風險。