香港人語文能力強，無論英文或港普味濃嘅對答一啲都難唔到我哋。但係去英語國語世界之外，除非你有學習外語，否則難免會遇上雞同鴨講嘅尷尬情況。
以下有幾種方法幫你克服語言障礙，暢遊無阻：
- 早作準備
資料搜集有咁詳盡得咁詳盡，到埗後跟計劃進行，減少突發情況嘅發生。帶一本教簡單當地會話嘅書籍，亦可以喺紙卡上面預先寫低一啲常用嘅單字同句子，或請精通外語朋友仔錄低口訊，到時show 或播出嚟就得喇。
- 了解當地文化
身體語言係好方便，不過都要預先做功課了解當地文化，避免擺烏龍。例如Okay手勢喺巴西、土耳其、委內瑞拉都有冒犯嘅負面意思。豎起手指公喺拉美、西非、伊朗、伊拉克、阿富汗，都係侮辱人嘅粗口手勢。要避免使用呀～ - 善用科技
Let’s Google！準備提問或點菜前，可以搵定圖片，等當地人一睇就明！Google翻譯App，用相機功能一對上文字就即時翻譯，幾準㗎。市面亦有好多即時翻譯App可以免費下載使用，去App Store 搜尋voice translator 就有。
最重要最重要係千祈唔好怕醜，有咩就問，通常當地人見到你係遊客都會幫手嘅，就算係被拒絕，喺外國食檸檬都係特別甜嘅。
